Google Translate အတွက် ဘာသာပြန်ကြတဲ့ပွဲ

 

Google ရဲ့ အခု ၉ဝမြောက်ဘာသာစကားထဲ ပါဝင်လာတဲ့ မြန်မာစာအတွက် အနီးစပ်ဆုံး ဘာသာပြန်ဆိုကြတဲ့ Translate-a-thon ပွဲကို ဖေဖော်ဝါရီ ၂၈ရက်နေ့က ဖန်တီးရာ Innovation Lab မှာ စိတ်ပါဝင်စားသူတွေ အများအပြား ပူးပေါင်းပါဝင်ခဲ့ကြပါတယ်။ အနာဂတ် မြန်မာစာကိစ္စ Google Translate မှာ တိကျတဲ့ဘာသာပြန်မှု မြင်ရတော့မလား။

ပြီးခဲ့တဲ့ ဒီဇင်ဘာကစတင်ခဲ့တဲ့ Google Translate မှာ မြန်မာဘာသာကို ပြန်ဆိုနိုင်တဲ့ အရည်အသွေး တိုးတက်ကောင်းမွန်လာဖို့အတွက် ကျင်းပတဲ့ ဒီပွဲဟာ အားရစရာကောင်းပြီး ဒေသတွင်းကနိုင်ငံတွေအပြင် ကမ္ဘာ့နိုင်ငံအများစုမှာလည်း Love Your Language အစီအစဉ် လုပ်သွားဖို့စဉ်းစားနေတယ်လို့ Google က ဆိုပါတယ်။

Google Translate မှာ မြန်မာစကားနဲ့ ရေးသားထားတဲ့အချက်အလက်တွေ နည်းပါးနေတာမို့ ပြည်တွင်းက မြန်မာစကားပြောသူတွေနဲ့ ပူးပေါင်းပြီး ဒီအစီအစဉ်ကို ပထမဆုံးအဖြစ် မြန်မာပြည်မှာ ကျင်းပတာဖြစ်တဲ့အကြောင်း၊ ဒီလှုပ်ရှားမှုဟာ တစ်ရက်တည်းမဟုတ်ဘဲ အားတဲ့အချိန်တိုင်း အွန်လိုင်းပေါ်မှာ ဘာသာပြန်ပြီး အားဖြည့်ပေးနေလို့ရတယ်လို့ ဆိုပါတယ်။

Google Translate မှာ မြန်မာစကားကိုထည့်သွင်းချိန်မှာ မြန်မာစာနဲ့ဖော်ပြထားတဲ့ အချက်အလက်နည်းပါလို့ အတိအကျပြန်ဆိုရာမှာ အခက်အခဲရှိနေပြီး ဖော်ပြထားတဲ့စာပမာဏအနည်းအများပေါ် မူတည်ပြီး သင်ယူရတာမို့ စာများလေလေ ဘာသာပြန်ရာမှာ ပိုတိကျလေလို့ဆိုပါတယ်။

ပြီးပြည့်စုံတဲ့ ဘာသာပြန်စက်ကြီးတစ်ခုဖြစ်လာဖို့ မဟုတ်ဘဲ လူတွေကြားက ဘာသာစကားအခက်အခဲကို ဖြေရှင်းဖို့၊ လေ့လာဆည်းပူးဖို့အတွက် Googleက ရည်ရွယ်တာဖြစ်ပြီး မြန်မာစာနဲ့ဖော်ပြထားတဲ့ အချက်အလက်တွေက အိမ်နီးချင်းနိုင်ငံက ဘာသာစကားတွေနဲ့ယှဉ်ရင် နည်းပါးတာကြောင့် အားလုံးက ဝိုင်းကူကြတာ အထောက်အကူပြုမယ်လို့ ဆိုလာသူက ကိုမောင်မောင်ဆန်းပါ။